ပြည်ထောင်စုအစိုးရအဖွဲ့ဝန်ကြီးဌာနများအနေဖြင့် လွှတ်တော်၌ မတည်နိုင်သည့်
ကတိများ ပေးခြင်းသည် ပြည်သူကို စော်ကားရာရောက်သည်ဟု ပြည်သူ့လွှတ်တော်
ကိုယ်စားလှယ် အချို့က ဝေဖန်လိုက်သည်။
ထန်းတစ်ပင်မြို့နယ်၊ ပြည်သူ့လွှတ်တော်ကိုယ်စားလှယ် ဦးစိန်ထွန်းက
“မတည်နိုင်တဲ့ကတိတွေကို မလုပ်ပေးနိုင်တဲ့ကိစ္စတွေကို (လွှတ်တော်မှာ)
ဖြေကြားသွားတာဟာ ပြည်သူကို စော်ကားရာရောက်တယ်”ဟု ပြောသည်။
ဇွန်လ ၃ရက်က ကျင်းပသည့် ပြည်သူ့လွှတ်တော်အစည်းအဝေးတွင် ပြည်သူ့လွှတ်တော်၊
အစိုးရ၏အာမခံချက်များ၊ ကတိများနှင့် တာဝန်ခံချက်များ ကော်မတီ၏
အစီရင်ခံစာကို ဖတ်ကြားတင်သွင်းရာအပြီး ၎င်းက
အထက်ပါအတိုင်းဝေဖန်လိုက်ခြင်းဖြစ်သည်။
ထို့ပြင် ပြည်ထောင်စုအစိုးရအဖွဲ့သည် လွှတ်တော်၌ ကတိပေးဖြေကြားမှုများသည်
ပေါ့လျှော့မှုများစွာရှိနေပြီး “ကတိတွေကို လွယ်လွယ်ပေးတတ်တယ်
ဖြစ်သလိုပြောတယ် ဝန်ကြီးတွေက”ပြည်သူ့လွှတ်တော်ကိုယ်စားလှယ် ဦးစိန်ထွန်းက
ဆိုသည်။
၎င်းက အချို့သော ကိစ္စရပ်များတွင် မည်သည့်ဘဏ္ဍာနှစ်တွင် ဆောင်ရွက်ပေးမည်၊
ဘတ်ဂျက်ရရှိမှုအပေါ်တွင် ဆောင်ရွက်ပေးမည်စသဖြင့် လွှတ်တော်တွင် အဆင်ပြေသလို
ဖြေကြားမှုများရှိသည်ဟုလည်း ၎င်းက ဖြည့်စွက်ပြောသည်။
အမရပူရမြို့နယ်၊ ပြည်သူ့လွှတ်တော်ကိုယ်စားလှယ် ဦးသိန်းထွန်းဦးကလည်း
မန္တလေးတိုင်းဒေသကြီးရှိ စက်မှုဇုန်များတွင် စက်ရုံထုတ်ရေဆိုးများကြောင့်
ပြည်သူများ ကျန်းမာရေး ထိခိုက်သဖြင့် လွှတ်တော်တွင် မေးခွန်းမေးခဲ့ရာ
ပတ်ဝန်းကျင်ထိန်းသိမ်းရေးနှင့် သစ်တောရေးရာဝန်ကြီးဌာန၊ မန်းစည်ပင်နှင့်
စက်မှုဝန်ကြီးဌာနတို့မှ ဆောင်ရွက်ပေးမည်ဟု ကတိပြုသော်လည်း မဆောင်ရွက်သေးဟု
ဆိုသည်။
“မေးထားတာ နှစ်နှစ်ရှိပြီ။ ပြုထားတဲ့ကတိကို အမှုမဲ့အမှတ်မဲ့ပဲဖြစ်သလား။
အကောင်အထည်မဖော်နိုင်တာလားဆိုတာ ကျွန်တော်အနေနဲ့ သံသယတော့ဖြစ်မိတယ်” ဟု၎င်းက
ဖြည့်စွက်ပြောသည်။
တောင်ဥက္ကလာပမြို့နယ်၊ ပြည်သူ့လွှတ်တော်ကိုယ်စားလှယ်
ဦးအောင်သိန်းလင်းကလည်း အဋ္ဌမအကြိမ်က ၎င်း၏ ကြယ်ပွင့်ပြမေးခွန်းကို
လျှပ်စစ်ဝန်ကြီးဌာန၊ ပြည်ထောင်စု ဝန်ကြီး ကိုယ်စား ဒုတိယဝန်ကြီးက ကျေးရွာ
၉၅ အား မီးလင်းရန် ယခုနှစ် ဘဏ္ဍာနှစ်တွင် ဆောင်ရွက်ပေးမည်ဟု
ဖြေကြားခဲ့သော်လည်း ယခုအချိန်ထိ ပြီးစီးအောင် ဆောင်ရွက်နိုင်ခြင်း
မရှိသေးဟု ပြောသည်။
ပထမအကြိမ်မှ နဝမပုံမှန်အစည်းအဝေးအထိ ပြည်သူလွှတ်တော်တွင်
လွှတ်တော်ကိုယ်စားလှယ်များက မေးခွန်းများမေးမြန်းကာ
ကတိဖြစ်ခဲ့သည့်မေးခွန်းများ၊ အတည်ပြုခဲ့သည့် အဆိုများကို အစိုးရအဖွဲ့က
ပြီးပြတ်အောင် အကောင်အထည် မဖော်နိုင်သေးသော လုပ်ငန်းများ ၁၁၁၈ ခုရှိသည်ဟု
ပြည်သူ့လွှတ်တော်၊ အစိုးရ၏အာမခံချက်များ၊ ကတိများနှင့် တာဝန်ခံချက်များ
စိစစ်ရေးကော်မတီ၏ အစီရင်ခံစာတွင် ဖော်ပြထားသည်။
Credit to > Mizzima < Thank
No comments:
Post a Comment