မွန်ပြည်နယ် မော်လမြိုင်မြို့
သီရိမင်္ဂလာရပ်ကွက်တွင် မွန်ပြည်နယ်၏ ပထမဦးဆုံးအဖြစ် သီရိမင်္ဂလာ
အိမ်ရာစီမံကိန်းကို စတင်အကောင်အထည်ဖော်နေပြီဖြစ်ကြောင်း သိရသည်။
မော်လမြိုင်မြို့ သီရိမင်္ဂလာရပ်ကွက် အုပ်ချုပ်ရေးမှူးရုံးရှေ့ အစိုးရပိုင်
မြေလွတ် ကိုးဧက နေရာတွင် နှစ်ဧကကို အသုံးပြုကာ ရှစ်ခန်းတွဲ လေးထပ်
အဆောက်အအုံ ငါးလုံးကို တစ်နှစ်အတွင်း တည်ဆောက်သွားမည်ဖြစ်ကြောင်း
မွန်ပြည်နယ် အစိုးရအဖွဲ့ဝင် စည်ပင်သာယာရေးဝန်ကြီးဒေါက်တာတိုးတိုးအောင်က
ပြောကြားသည်။
''ယခုနှစ် မတ်လကစပြီး နောက်နှစ် မတ်လအပြီးဆောက်မယ်၊
ဒီထက်စောဖို့ပဲရှိတယ်။ ရှစ်ခန်းတွဲ လေးထပ် ငါးလုံးဆိုတော့ အခန်း ပေါင်း ၁၆ဝ
ရမယ်။ အိမ်ပိုင်မရှိသေးတဲ့ အိမ်ထောင်စု ၁၆ဝ အတွက် အဆင်ပြေသွားပြီပေါ့။
အိမ်ခန်း တစ်ခန်း ၆ဝဝ စတုရန်းပေ ကျယ်ပြီး အိပ်ခန်း၊ ရေချိုးခန်းနဲ့ အိမ်သာ၊
မီးဖိုခန်းတွေပါမယ်။ ကင်ပွန်းချုံ ကန်က ရေကိုသွယ်ပေးပြီး အိမ်ခန်းတစ်ခန်း
မီတာတစ်လုံးစီတပ်ဆင် ပေးမယ်။ ပန်းခြံနဲ့ ဈေးတို့လည်း ပါဝင်မယ်လို့ ၄င်းက
ဆက်လက် ပြောကြားခဲ့သည်။
အဆိုပါ အဆောက်အအုံကို မွန်ပြည်နယ်
စည်ပင်သာယာရေး ကော်မတီက တည်ဆောက်ခြင်းဖြစ်ပြီး မြေညီထပ်တစ်ခန်း
ငွေကျပ်သိန်း ၁၃ဝ၊ ကျန်အထပ်များကို တစ်ခန်းလျှင် ငွေကျပ်သိန်း ၁၂ဝ
နှုန်းဖြင့် အိမ်ပိုင်မရှိသော ဝန်ထမ်းများအတွက် (သက်ဆိုင်ရာအရာရှိ၏
တာဝန်ခံပေးမှုဖြင့်) အရစ်ကျ (ငါးနှစ်)ရောင်းချ ပေးသွားမည်ဖြစ်ကြောင်း
သိရသည်။
''လက်ရှိ လုပ်သက်ရင့် ဝန်ထမ်းတွေကို ဦးစားပေးမယ်။
ပြီးတော့ သီရိမင်္ဂလာ ရပ်ကွက်မှာလုပ်တဲ့အတွက် အဲဒီရပ်ကွက်က ဝန်ထမ်းမဟုတ်တဲ့
ပြည်သူတွေအတွက်လည်း အဆောက်အအုံတစ်လုံး၊ အိမ်ခန်း ၃၂ ခန်းစာကို
ရောင်းချပေးမယ်။ မီးအားအပြည့်အဝ ရဖို့လည်း ၃၁၅ KVA ထရန်စဖော်မာ
နှစ်လုံးလည်း တပ်ဆင်ပေးသွားမယ်လို့ အဆိုပါဝန်ကြီးက ပြောကြားခဲ့သည်။
အိမ်ခန်း လျှောက်ထားလိုသူများသည် မတ် ၁ ရက်မှစ၍ မွန်ပြည်နယ် စည်ပင်သာယာရေး
ကော်မတီရုံးတွင် လျှောက်ထားနိုင်ပြီး ဝယ်လိုအားပေါ်မူတည်၍ နောက်ထပ်
အိမ်ခန်းများလည်း အမြန်ဆုံး တည်ဆောက်ပေးသွား မည်ဖြစ်ကြောင်း သိရသည်။
No comments:
Post a Comment